SRI AMAN: Chap Goh Mei ke dirami raban bansa Tiong Hua ba hari ke-15 pengerami Taun Baru China dipeda tau nyadi sebengkah main asal ke nyelai sereta tau matak penatai temuai ke nengeri tu.
Menteri Muda Pemansang Menua Pesisir enggau Pengawa Berumah, Datuk Francis Harden Hollis madah, enti diperati pengawa bejalai baraban ke diatur ninting taun ditu, tau bendar matak penatai temuai ke mengeri tu.
“Ba rayat Sri Aman, pengerami Chap Goh Mei tu endang sebengkah main asal ke nyelai laban tebal agi orang ke nyereta pengawa tu naka ke diatu raban bansa Tiong Hua kelimpah dipasuk raban bumiputera.
“Tu meh ke dikumbai penyerakup laban semua bansa bepeluang ngintu pengerami enda ngira nya bansa Iban, Melayu enggau bansa bukai laban kitai bela idup bepelasarka ayu 1 Malaysia,” ku iya.
Harden ke mega Kaban Kunsil Nengeri (ADUN) Simanggang madah munyi nya rambau dirandau Utusan Borneo pengudah nyereta pengawa bejalai beraban Chap Goh Mei 2015 ditu malam ensana.
Kenu ku iya, pengerami Chap Goh Mei bisi penau digaga nyadi sebengkah produk dagang temuai ungkup mengeri tu laban iya nyelai ari pengerami bukai sereta jarang dipeda.
“Ngelama tu, mengeri Sri Aman chukup tebilang enggau Pesta Benak. Nya alai, pengerami Chap Goh Mei ulih dikena ngelakuka menua Sri Aman ngagai bala temuai,” ku iya.
Nangkan ke nya, iya minta mensia mayuh terus besaup enggau pangan diri ngelakuka pengerami tu ngagai temuai luar maya ngintu pengerami tu taun seiti nyin ila.
“Sebengkah ari chara tu iya nya nengah tanggungpengawa raban media ke ulih nulung nabur penerang ngagai mensia mayuh kelebih agi nengah televisyen, surat kabar, internet enggau nengah Opis Menteri Dagang Temuai.
“Nama utai ke dipeda, promosyen ke digaga dikena ngelakuka Pesta Benak chukup ngasuh ati temegah laban temuai ke datai ukai semina ari menua tu aja tang mega ari menua luar rindu datai ngemantaka Benak kitai di Sri Aman,”ku iya.
Sama bisi datai ba pengerami tu Residen Bahagian Sri Aman, Jonathan Lugoh, Pemesai Pelilih Sri Aman, Ismawie Salleh sereta bala bukai.
No comments:
Post a Comment