SRI AMAN: Menteri Muda Pengelantang Komuniti Sarawak, Datuk Francis Hollis mandangka pengeran bekerejasama, pengeransing enggau pengelurus bala ketuai sereta kaban gerempung nya elemen ti beguna dikena ngetanka penyulut sesebuah gerempung.
Nitihka iya, elemen nya patut bisi dikembuan dikena nentuka tetiap gerempung ulih regas sereta meri pemaik ngagai komuniti.
“Enti ketuai enggau kaban gerempung enda bekerejasama tauka suah carut, gerempung nya tentu enda ulih nyapai penyulut,” ku iya.
“Nya alai, kitai ngelalau semua ti nyadi ketuai ke ngirit sesebuah gerempung ngemeratka pengandal bekerejasama, rajin sereta lurus ngatur pengawa ke diberi,”
Harden ke mega Kaban Kunsil Nengeri (ADUN) Simanggang nya madah munyi nya maya bejaku pandak ba Pengawa masang lampu di Tokong Ciyun, Mengeri Sri Aman ke diatur Gerempung Soon Heng, Sri Aman nandaka berengkah musim pengerami Taun Baru Cina 2020 ba renggat Bagi Menua Sri Aman ditu.
Ku iya, nengah aktiviti ke diatur, kaban gerempung ulih betanya enggau pangan diri, besilih penemu sereta bejuraika agenda baru gerempung.
“Kerejasama ari semua kelebih agi maya ngatur aktiviti tauka program beguna amat dikena nentuka juluk nya dijapai,” ku Harden seraya nambah tanggungpengawa ulih nyadi mudah enti kaul ti tegap bisi entara ba semua kaban gerempung.
Harden nambah, Taun 2020 dalam kalenda komuniti Cina iya nya taun Chit Emas.
“Chit mandangka pengeransing begigaka pengaya enggau pengelantang ba pengidup kelimpah idup begulai dalam pengelikun sereta ngemeratka kerejasama,” ku iya agi.
Sama bisi datai ba pengawa nya, bini Harden, Datin Simba Nalang, Ketuai Kunsil Opis Kaunsil Pelilih Sri Aman (MDSA), Anthony Abell Chendan, Temenggong Kueh Aik Seng, Pemancha Lee Siang Hua, Chairman Gerempung Soon Heng, Sri Aman, Tay Ah Tee enggau Tay Chiew Hua, Sekreatari Gerempung Soon Heng, Sri Aman, Goh Kaw Sze, Kapitan Tay Siaw Chuan sereta Kapitan Kiew Sii Ted.
No comments:
Post a Comment