Festival Antu Lapar narit mayuh temuai

Festival Antu Lapar narit mayuh temuai

Oleh : NewsDesk

Tarikh Disiarkan : 24-Aug-2013

• 
• MERI PEMAKAI ... Mayuh bengkah bansa pemakai disediaka ngambika diempa roh ke udah mati dipelabaka bisi sama enggau nyereta Festival Antu Lapar ba Tokong Chun Yin, Sri Aman kena Hari Tiga ke udah.

SRI AMAN: Tokong Chun Yin, Sri Aman nyadi palan penatai lebih ari 300 iku orang ke diau ba endur nya empu kena malam Hari Tiga ke udah laban deka nyereta tauka meda Festival Antu Lapar tauka Hungry Ghost Festival. Tebal agi sida ke diau ba endur nya bepengarap agama Taoist enggau Buddha lalu tuju sida ke bisi datai maya nya laban deka meri basa ngagai roh aki ini sida dipelabka bisi datai ari menua sebayan sama enggau nyambut festival nya.

“Festival nya diatur genap malam ke lima belas bulan ketujuh dalam kalender China. Maya malam nya pintu neraka enggua serega deka dibuka lalu roh semua aki ini sida ke bepengarap agama Buddha enngau Taoist deka pansut nyereta kitai mensia. “Nya alai sida ke bepengarap agama nya ngatur pengerami sembiang dikena ngurangka penusah ke bisi nuntung roh aki ini sida ngena Festival Antu Lapar nya,” ku seiku orang ke bepengarap nya ke sama bisi datai ba Fetival Antu Lapar. Festival Antu Lapar ke diatur Gerempung Soon Heng Simanggang ba Tokong Chun Yin, Sri Aman nya berengkah ari pukul 4.00 ngalih hari kena Hari Tiga ke udah.

Festival nya berengkah enggau sembiang sereta ditangkanka enggau belagu sereta meri pemakai ngagai bala roh aki indi pengarap agama nya nyentukka ngagai pukul 10.00 malam. Festival Antu Lapar nya diatur nitihka chara asal Gerempung Soon Heng Simanggang nyengkaum sembiang, merindang ngena lagu enggau meri pemakai serebak enggau ai pasang nyentukka ai surut ba Sungai Batang Lupar, Sri Aman. Lebuh ai berengkah surut maya pukul 10.00 malam semua tiga pengawa nya diketuka laban deka nunu duit keretas enggau mayuh bengkah barang ngagai roh ke udah mati ke digaga ari keretas. Festival Antu Lapar ke diatur Gerempung Soon Heng Simanggang nya tembu urung pukul 11.15 malam lebuh semua sida ke bepengaeap Buddha enggau Taoist udah abis nunu duit enggau mayuh bengkah barang ngagai roh aki ini sida.

Seiku orang raban bansa Iban lebuh dirandau ngasuh Festival Antu Lapar nya nyadi siti ari festival ninting taun ba Bandar Sri Aman ngambika ulih narit bala temuai pengudah tu. Utusan Sarawak bisi dipadahka Gerempung Chee Chuan Khor Simanggang sida mega deka ngatur Festival Antu Lapar ba Jalai Bayu, Sri Aman berengkah ari malam kemari (Hari Lima) nyentuka ngagai malam pegila (Hari Minggu).

http://www.utusansarawakonline.com/news/4924/Festival-Antu-Lapar-narit-mayuh-temuai/