Menua Malaysia bisi penyelai, ku Harden
by Kelvin Lambai. Posted on February 19, 2013, Tuesday
DIPENYADI: Harden (tiga kiba), Masir (dua kiba), begulai enggau ketuai raban bansa China bejadika programnya ditu.
SRI AMAN: Malaysia nadai kala pungkang endur temuai ari menua tasik nemuai sereta tebilang ba serata dunya laban menua Malaysia tu ditemu likun endur nemuai.
Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis madah, Malaysia mega tebilang ngembuan mayuh macham adat asal, tambah mega pupu raban bansa ke nguan menua ngembuan penyerakup ke tegap.
“Pekara tu meh nyadika menua Malaysia tu nyelai laban rayat iya ulih idup likun enggau pangan diri”, ku iya.
Iya ke mega Kaban Kunsil Nengeri (ADUN) Simanggang bejaku munyi nya lebuh ti bejadika ‘Malam Kebudayaan dan Kesenian Pesta Cap Goh Mei ‘ tiaks Bagi menua Sri Aman 2013, ke diatur Gerempung Soon Heng Simanggang begulai enggau Opis Residen Bagi Menua Sri Aman ba Tebing Sungai Batang Lupar, Sri Aman ditu malam ensanus.
“ Perintah amat ngarapka penyerakup enggau pengelikun tu ulih ditanka belama ngambi pulaika pemanah ngagai semua pupu raban bansa ke nguan menua tu,” ku iya.
“Arapka mega nengah program ke diatur tu ulih ngenampakka agi adat enggau main rayat Malaysia sereta ngetanka peyerakup enggau pengawa begempung ba rayat,” ku iya.
Berebak engagu nya, Harden mega ngelalau nembiak rebak baru majak ngintu sereta sayauka adat asal sida ngambika enda lenyau ketegal dunya majak mansang moden.
Ku iya, nembiak rebak baru meh ke nampung semua main enggau adat adat bansa sida dudi ila.
Kelimpah ari nya, nadai salah belajarka main enggau adat asal bansa bukai laban kitai diau dalam sebuah menua ke diuan mayuh bengkah pupu raban bansa enggau jalai pengarap, laban nengah chara nya mega kita ulih nyempilka kaul enggau bansa bukai, ku iya. .
“ Rayat di menua tu kelebih agi nemb iak rebak baru patut berasai temegah ati laban ke bisi adat enggau main bansa enti dibanding enggau rayat ba sekeda menua bukai ke udah lenyau pengelala bansa sereta main enggau adat asal ketgal enda diintu sereta alah laban pemansang dunya moden,” ku iya.
Lebuh ke ngenang ‘Malam Kebudayaan dan Kesenian ‘ nya, Francis berasai temegah endar ati laban sambut ke manah endar sereta manah amat nyadika pelasar kena negapka penyerakup ba rayat Malaysia.
“ Sebengkah pekara ke amnah dipeda aku ditu iya nya, raban ke betanda singa ba pengerami tu ukai semina ari raban bansa China aja, tang mega bisi nembiak ari bansa bukai baka Iban enggau Melayu.
“ Tu mandangka nembiak ari raban bansa bukai pan deka belajarka pengerindu ba tanda nya, lalu pekara tu ngemegahka ati kitai ke semua rayat Malaysia,” ku iya.
Beserimbai enggau pengerami nya, Harden mega ngungkupka belanja RM 15,000 ngagai Gerempung Soon Heng Simanggang ngambika bisi kena sida ngatur pengerami Cap Goh Mei ini ila.
Kelimpah ari nya, iya mega ngungkupka belanja sama bela RM 5000 ngagai RANDO Sri Aman, MAKSAK Sri Aman Opis Pelilih Mit Sri Aman kena sida ngatur pengawa sepemanjai taun sida.
Sama bisi ngulu pengerami nya, Kaban Parlimen Sri Aman, Masir Kujat, Pemesai Khas Sapit Menteri Dagang Dalam Menua, Koperasi Enggau Orang Bebeli Barang Malaysia ke mega Kaban Parlimen Batang Lupar, Datuk Rohani Abdul Karim, Mohd Saperi Abdul Karim, Residen Bagi Menua Sri Aman, Jonathan Lugoh, Sapit Residen (Pengawa Rama) Bagi Menua Sri Aman, Felicia Tan Ya Hua, Chairman Gerempung Soon Heng Simanggang, Datuk Tan Chong Meng, Temenggung Sii Toh Peng, Chairman Komiti Pengawa ke mega Mandal Chairman Komiti Besai Pengerami Cap Goh Mei Tikas Bagi Menua Sri Aman, Tay Yaw Ming, bala ketuai opis enggau bala ketuai raban bansa di menua nya.
No comments:
Post a Comment